ເກືອບທຸກປະເທດທີ່ຢູ່ໃນ ຫລື ຢູ່ອ້ອມຂ້າງ Caribbean ຜະລິດເຫລົ້າຣັມຂອງຕົນເອງ ສ່ວນໃຫຍ່ຈະໃຊ້ອ້ອຍເປັນສ່ວນປະສົມພື້ນຖານ ອາດເປັນນໍ້າອ້ອຍສົດ, ນໍ້າເຊື້ອມອ້ອຍ ຫລື ກາກນໍ້າຕານ. ສ່ວນປະສົມພື້ນຖານນີ້ ຈະຖືກຫມັກ ຕາມດ້ວຍການກັ່ນໃນເຄື່ອງກັ່ນເຫລົ້າ ແບບ pot ຫລື column still ແລະ ມັກຈະປະສົມເຫລົ້າຣັມທີ່ໄດ້ຈາກທັງສອງເຄື່ອງກັ່ນເຫລົ້າເຂົ້ານໍາກັນ. ໄລຍະເວລາທີ່ເຫລົ້າຣັມຖືກບົ່ມໃນຖັງໄມ້ໂອກຫລັງການກັ່ນ ຈະເປັນໂຕກຳນົດສີ ແລະ ລົດຊາດ. ໃນຂະນະທີ່ພູມິປະເທດຈະເປັນໂຕບົ່ງບອກເຖິງລັກສະນະຂອງຣັມ.

ຣັມສີຂາວ (white rum) ມີສີໃສ ແລະ ລົດແຫ້ງ, ບົ່ມໃນຖັງໄມ້ໂອກທໍາມະດາທີ່ບໍ່ມີສີ ຫລື ຖັງເຫລັກ ໃນໄລຍະເວລາອັນສັ້ນ. ຣັມສີຂາວ ເຫມາະແກ່ຄ໋ອກເທລ Daiquiri ແລະ Mojito.

ຣັມສີທອງ (golden rum) ມີສີເຫລືອງໃສ ໄດ້ຈາກການເກັບບົ່ມໄວ້ໃນຖັງໄມ້ໂອກທີ່ຜ່ານການເຜົາເພື່ອໃຫ້ເກີດສີ ຫລື ປະສົມສີ ກິ່ນ ລົດຊາດຂອງຄາລາເມລທີ່ໄດ້ຈາກການຂ້ຽວນໍ້າຕານ ເພື່ອໃຫ້ໄດ້ເຫລົ້າຣັມທີ່ມີສີ ກິ່ນ ລົດຊາດຫລາຍຂຶ້ນກວ່າເກົ່າ ຣັມສີທອງມີລົດອອກຫວານ, ມີກິ່ນຂອງວານິລາ ຫລື ກິ່ນຮືນຂອງເຄື່ອງເທດ.

ຣັມສີດໍາ (dark rum) ມີສີເຫລືອງຄາລາເມວທີ່ເຂັ້ມກວ່າຣັມສີທອງ ໄດ້ຈາກການເກັບບົ່ມໄວ້ໃນຖັງໄມ້ໂອກເປັນເວລາດົນກວ່າ ຫລື ປະສົມສີ ກິ່ນ ລົດຊາດຂອງຄາລາເມລທີ່ໄດ້ຈາກການຂ້ຽວນໍ້າຕານຈົນເປັນສີດໍາເກືອບໄຫມ້. ເຫລົ້າຣັມສີດໍາຈະມີລົດທີ່ເຂັ້ມຂຸ້ນຂອງເຄື່ອງເທດ, ວານິລາ, ກິ່ນນໍ້າຕານຊາຍແດງ ສາມາດດື່ມແບບພຽວໆ ຄືກັບເບີເບິນ. ເຫລົ້າຣັມສີດໍາທີ່ມີອາຍຸສູງ ຍິ່ງມີລາຄາທີ່ສູງຂຶ້ນ.

ຣັມສີດໍາ ແບລກສະແຕຣບ (black strap rum) ມີສີທີ່ເຂັ້ມເຖິງດໍາ, ມີລົດຊາດທີ່ເຂັ້ມຂຸ້ນ ແລະ ຫວານຫລາຍ. ສີດໍາເຂັ້ມໃນເຫລົ້າຣັມປະເພດນີ້ແມ່ນໄດ້ມາຈາກການເພີ່ມຄາລາເມລທີ່ໄດ້ຈາກການຂ້ຽວນໍ້າຕານ ຫລື ກາກນໍ້າຕານຈົນເປັນສີດໍາເກືອບໄຫມ້ຫລັງການໝັກເຫລົ້າຣັມ.

ຣັມອາກຣິໂຄ (rhum agricole) ຜະລິດມາຈາກນໍ້າອ້ອຍສົດ ທຸກຂະບວນການຜະລິດຣັມນີ້ ບໍ່ວ່າຈະເປັນການເກັບກ່ຽວອ້ອຍ, ຄັ້ນນໍ້າອ້ອຍ, ການຫມັກ ແລະ ການກັ່ນ ຕ້ອງເຮັດຢູ່ໃນບໍລິເວນທີ່ປູກອ້ອຍ. ເຫລົ້າຣັມອາກຣິໂຄຈະມີທັງແບບ ຣັມສີຂາວ (white rum) ທີ່ບໍ່ມີອາຍຸ ແລະ ຣັມສີດໍາ (dark rum) ທີ່ມີອາຍຸ.